讲到波斯尼亚足球，大部分球员会先谂起传奇前锋迪斯高，呢位老牌射手喺国家队由21岁踢到依家40岁、由2014年首次进军世盃到12年後再战决赛周，都系靠佢孭飞。不过领队巴巴斯喺世盃前表示，波斯尼亚未来10年嘅王牌已经出现！

巴巴斯今次世盃点兵，21岁嘅马希米成为焦点，效力捷克球会利巴域嘅佢，5月份先至由出生地奥地利转藉波斯尼亚，赶及出战世盃决赛周。据报波斯尼亚总监史柏希斯过去1年不断游说，令马希米决定「转会」，佢今季喺捷克联赛有7入波同3助攻，系波斯尼亚需要嘅创造力。

波斯尼亚领队巴巴斯，对马希米加入非常兴奋：「你唔会明白我有几兴奋同光荣，马希米可以踢10号同8号，佢呢种类型系波斯尼亚所欠缺。马希米仲有好大嘅进步空间，波斯尼亚得到一个未来10年嘅王牌球员。」据报土超劲旅加拉塔沙雷对佢虎视眈眈，如果佢喺世盃有出色表现，进军欧洲5大联赛都唔令人意外。