阿仙奴力争首夺欧联冠军，决赛周迎嚟最大喜讯，荷兰右闸祖利安添巴周四(28日)完成复出後首课操练，令「兵工厂」依家只剩宾韦特一名伤兵，不过决赛用唔用添巴担正，会系领队阿迪达一大烦恼。

巴黎圣日耳门(PSG)左翼基华拉斯基利亚，公认系当今「世一」翼锋，阿仙奴点样应对系胜负关键。添巴系阿仙奴正选右闸，上届欧联两战PSG都同基华拉斯基利亚斗到难分难解，亦呢对手两场都入唔到波。

不过，添巴因为足踝伤患，自3月中对爱华顿後一直养伤，已经2个半月未有比赛。由於副选右闸宾韦特重伤，近期改用基斯甸摩斯基拿客串，表现不过不失，但今场对住基华拉斯基利亚，用边个踢就系一大难题。

前阿仙奴球星麦臣就投添巴一票，佢受访表示：「我听闻添巴可以复出，咁佢一定要踢，就算佢状态只系得50%，我都会选择博一铺，阿仙奴需要佢。」