马体会前锋苏亚雷斯将於今夏约满离队，已经成为公开嘅秘密，会方需要签入新射手，西班牙传媒指今季喺意甲表现大熟大勇嘅基奥云尼施蒙尼成为收购目标，若然成事，佢就可以同身为教练嘅爸爸施蒙尼父子档合作。

现年26岁嘅基奥云尼施蒙尼系施蒙尼嘅大仔，但佢并未曾喺西甲搵食，近6年一直喺意甲打滚，效力过热拿亚、费伦天拿、卡利亚里，今季被卡利亚里外借去维罗纳，上阵32场联赛入16球，创出个人单季联赛入球新高。

西班牙传媒认为「小施」有能力加盟大球会，令事业更上一层楼，转投马体会系一个唔错选择。事实上，基奥云尼施蒙尼承认自己系马体会球迷，希望有朝一日可以效力呢支西甲球队，同爸爸拍住上。

5年前施蒙尼曾经表示，如果两父子同队，会令囝囝承受不必要嘅压力，对佢足球事业发展不利。不过，基奥云尼施蒙尼依家已经大个仔，相信识得处理压力，都系时候帮助爸爸，带领马体会下季重回西甲争标行列。