波兰前锋罗拔利云度夫斯基为转会巴塞隆拿，今夏同效力8年嘅拜仁慕尼黑反晒面，佢上个月终於如愿转会，「罗拔仔」为同旧东家冰释前嫌，日前专程飞返慕尼黑同球会上下道别，仲「大晒冷」同佢喺拜仁赢得嘅24个奖盃大合照，希望球迷记得佢嘅功劳。

罗拔仔转会前曾公开批评拜仁对佢缺乏尊重，拜仁高层亦指佢唔尊重合约，8年合作搞到丑陋收场，「罗拔仔」周二(2日)飞返拜仁同队友、职员道别，佢就话：「一切都好好，我同所有人见面并多谢佢哋，我唔会忘记喺拜仁得到嘅嘢。」

罗拔利云度夫斯基效力拜仁8年间，上阵375场入344球，期间拎过24个球会同个人奖项，包括8次德甲联赛冠军、3次德国盃冠军、5次德超盃冠军、1次欧联冠军等等，个人奖项亦有欧洲金靴奖、德甲神射手等等，佢离开前就同所有奖盃大合照，认真威水！