皇马翼锋马高阿辛斯奥将於明夏约满，明年1月就可以同其他球会倾自由身加盟事宜，近日传出皇马宿敌巴塞隆拿有意签入呢位26岁西班牙国脚，阿辛斯奥亦表明唔排除加盟任何球队，意味有可能做「超级叛徒」加入巴塞阵营。

绰号「皇马太子」嘅马高阿辛斯奥已经效力「银河舰队」8年，佢被传媒问到巴塞想签入佢一事，呢位翼锋话：「明年1月开始，我可以同任何球队倾加盟问题，有传言出现系好正常嘅事，我未收过巴塞方面嘅电话，将来嘅事冇人知。」

其实开季前已传出马高阿辛斯奥可能离队，佢喺早前西甲对马略卡，因不满热身後，不获派上阵，大发脾气掟水樽，进一步加深佢同球会嘅紧张关系，绝对有机会把心一横转投巴塞隆拿。

值得一提，西班牙国家队主帅安历基球员时代都系由皇马转投巴塞隆拿後，创出事业高峰，马高阿辛斯奥可能会追随呢位前辈步伐。