曼联今季成绩起飞，查顿辛祖就斯人独憔悴，早前因状态差劲被领队坦哈格打入冷宫，不过周四(2日)英联盃4强对诺定咸森林，呢位英格兰球星就相隔102日再披曼联战衣，喺奥脱福球迷不断高唱佢个名打气下，查顿辛祖以「10号」位置上阵表现突出，坦哈格更暗示呢个可能系佢嘅新位置。

查顿辛祖自上年10月22日後，一直因伤患同状态问题被雪藏，今场佢喺62分钟上阵，入替前更喺场边同坦哈格搭晒膊头密密斟，球迷就不断唱歌欢迎佢回归。查顿辛祖今场改踢10号位，经常喺箭头安东尼马迪尔身後策动攻势，曼联嘅进攻更加到肉，2比0嘅2个入波都喺查顿辛顿入场後先出现。

坦哈格赛後表示：「查顿辛祖复出系好事，球员最紧要系享受足球，球迷嘅反应亦畀佢力量同动力。查顿辛祖可以踢10号位同翼锋，佢可以将呢两个位置融合，呢点亦系我最锺意佢嘅地方。」