周日(5日)凌晨英超大战，曼联主场2比1惊险击败水晶宫，喺奥脱福球场连胜走势增加至13场，积分榜亦跳升一级上第3位。曼联今仗有中场灵魂卡斯米路失控，叉颈被逐将要停赛3场，不过曼迷似乎唔太介意，事关卡斯米路可以抖足精神备战欧霸附加赛同英联盃决赛，唔惊踢残。

曼联今场开局顺利，7分钟就有水晶宫球员禁区内手球获得12码，般奴费南迪斯操刀先开纪录，62分钟拉舒福特接应劳基梳尔传中射成2比0，睇住大局已定之下，70分钟安东尼马菲奥斯被侵犯引起双方冲突，期间卡斯米路曾向韦晓士叉颈，球证睇VAR向呢位巴西中场出示红牌，水晶宫随即由舒洛比追番1粒，可惜为时已晚仍要输1比2。

Opta数据显示，曼联喺主场已经13连胜，系自2010年至11年後球会最长主场连胜纪录，不过领队坦哈格赛後批评球证执法：「曼联踢得好好，而且团结一致，佢哋唔接受有球员可能被踢到严重受伤(安东尼)，卡斯米路系过咗火，但佐敦阿休嘅行为比佢更恶劣，VAR嘅判决需要更加一致。」

不幸中之大幸系，卡斯米路停赛3场，啱啱赶得切喺英联盃决赛对纽卡素复出，而且期间中夹住2场欧霸附加赛对巴塞隆拿嘅大战，意味卡斯米路可以集中精力应付呢3场更重要嘅比赛，佢只系会错过主客场2斗列斯联，以及主场对李斯特城3场联赛。

英国《太阳报》引述曼迷网上留言：「曼联冇卡斯米路都可以应付呢几场联赛，佢可以叉足电对巴塞隆拿」、「如果可以拣停赛对手，列斯联同李斯特城就系好选择」、「一个抖足嘅卡斯米路应付欧霸同英联盃决赛，可能系件好事」。