利物浦一直有意收购多蒙特中场祖迪比宁咸，但呢位19岁英格兰国脚身价超过1亿镑(约9.7亿港元)，加上要面对皇马等豪门竞争，签入佢非常困难。英国传媒指红军已经转移目标，向拜仁慕尼黑中场赖恩格云贝治埋手。

现年20岁嘅赖恩格云贝治上年夏天以1,800万欧元(约1.5亿港元)转会费由阿积士转投拜仁慕尼黑，但不获重用，德甲上阵17次只有1次担任正选，令佢意兴阑珊。

其实呢位荷兰国脚实力不俗，之前为阿积士披甲103场，射入12球及13次助攻，加上仍然年轻，利物浦领队高普认为佢系可造之材。由於赖恩格云贝治只系拜仁大後备，估计呢支德甲劲旅应该愿意放人。

除咗赖恩格云贝治之外，高普亦睇中英冠布里斯托城中场阿历士史葛，呢位19岁小将虽然年纪轻轻，但近2季都系布里斯托城主力，被视为另一位祖迪比宁咸，所以引起高普兴趣。

利物浦中场退化问题严重，若然可以签入呢2位新星，肯定能够大大提升球队活力。