德甲煞科日出现戏剧性结局，多蒙特喺最後几分钟被拜仁慕尼黑超前，失落冠军宝座，马高列奥斯同一众队友完场後情绪崩溃，摊喺草地上痛哭。马高列奥斯被视为德甲其中一位天才球星，但足球生涯一直坎坷，今次系佢第7次德甲亚军，仍未染指过冠军宝座，继续做悲情主角。

多蒙特距离11年来首个德甲冠军只差几分钟，完场後一众球员倒地痛哭，其中马高列奥斯嘅泪水最令球迷心痛，呢位33岁忠臣喺2012年加盟多蒙特，过去11季都冇办法打破拜仁垄断，其中7季做德甲亚军；2013年欧联决赛又系输畀拜仁做「阿二」；国家队方面，佢2014年喺世盃缺赛周前因伤落选，结果德国勇夺冠军，4年後佢终於有份参赛，德国就分组赛出局，绝对系「地狱黑仔王」。

多蒙特教练泰锡完场後亦流下男儿泪，佢之後受访表示：「当你喺更衣室见到每个球员都摊喺地上，灵魂空虚，我觉得好痛心、好唔公平。多蒙特距离冠军只系90分钟、只系差1个入球...听日又系新一日，日子依然要过，我哋会用之後34场联赛去实现德甲冠军梦想。」