周日(28日)凌晨法甲赛事，巴黎圣日耳门(PSG)作客1比1打和斯特拉斯堡後，提前一轮锁定法甲冠军。今场入波嘅美斯，累积496个欧洲5大联赛入波，超越「死对头」C朗拿度(495球)，成为欧洲5大联赛史上入波最多球员。盛传美斯将会结束2年法甲之旅，呢个亦算系圆满句号。

PSG今场只要拎1分就封王，但今场表现唔及主队锐利，上半场互交白卷。59分钟两大球王合作，基利安麦巴比左路传入禁区，美斯巧妙入楔射成1比0，虽然斯特拉斯堡79分钟由加美路追平，但1比1嘅赛果亦足够令PSG夺冠，亦系PSG近6年第5次喺法甲封王。

盛传帅位不稳嘅PSG教练加迪亚赛後表示：「我哋今日睇咗德甲煞科，你会明白赢冠军系好难，喺任何联赛都一样，大家要知道赢法甲冠军唔系一件平常事，即使系巴黎圣日耳门都一样。」美斯今夏同PSG约满，消息指佢几乎肯定离队，煞科战对克莱蒙特好可能系球王嘅告别战。