英超煞科亦意味各路大军进入换血时间，阿仙奴中场格列沙加、利物浦前锋罗拔图法明奴两位英超名将，周日(28日)齐齐喺佢哋嘅「告别战」入波，作为送畀球迷最後嘅礼物，令英超煞科日多添一份感动。

阿仙奴中场格列沙加近期正同利华古逊斟介转会，虽然仍未正式落实，但佢今夏重返德甲已经系「公开嘅秘密」，今仗主场对狼队，现场球迷亦纷纷高举「多谢格列沙加」嘅横额。更有意思嘅系，向来入波唔多嘅格列沙加，喺14分钟竟然梅开二度，佢入波後亦走向场边多谢领队阿迪达同一众球迷，阿仙奴最终大胜5比0完场。

格列沙加效力阿仙奴7年，早期表现备受批评，2019年更曾经受唔住球迷谩骂，喺球场上公然发脾气反击，亦令佢被褫夺队长职务，当时呢位瑞士国脚已决意离队，但冇耐由阿迪达接手後，阿迪达成功游说佢继续留低，近2季改踢Box to Box位置更大放异彩，今季7个联赛入波系佢之前4季加埋总和，今次因为家人希望返德国定居而离队，得以喺球迷掌声中昂首离开。

季尾约满离开利物浦嘅罗拔图法明奴，煞科战作客修咸顿亦正选上阵，佢喺14分钟施展魔术脚法搞到2名敌位跌晒落地後入波，用入球结束8年「红军」生涯，佢喺57分钟被换离场嗰阵，连主队球迷都起立为佢致敬。利物浦今场同修咸顿踢成4比4平手。