周六(27日)晚德甲煞科日王者战，多蒙特同拜仁慕尼黑将会分途出击，多蒙特喺榜首领先2分，主场只要击败缅恩斯就可以封王，但和波嘅话就要睇拜仁作客对科隆嘅结果，如果拜仁胜出，两队同分将先以得失球作计算，拜仁喺得失球暂时领先多蒙特14球，所以边支球队封王，真系要斗到最後。

德甲煞科日多蒙特主场迎战缅恩斯，上轮戏剧性重登榜首嘅「蜜蜂兵团」决心十足，佢哋今仗只要赢波，就可以相隔11年後再尝联赛冠军滋味，落到场会毫无保留。多蒙特主场气势凌人，抢攻踢法经常杀对方措手不及，随时上半场已开杀戒，1.5球嘅半场大抵玩！（周六晚上9时30分开赛）

多蒙特季尾大爆发，乘住拜仁慕尼黑低潮成功後来居上，依家距离冠军只差最後一步，喺主场出击当然唔会有任何松懈。多蒙特联赛主场已获11连胜气势凌人，当中有10仗能够喺半场领先，多蒙特「黄墙」嘅惊人震慑力，唔系咁多球队可以顶得住。

「蜜蜂兵团」火力惊人，近5仗主场狂入23球，施巴斯坦贺拿、艾迪耶美、祖利安白兰特同当耶尔马伦等攻击球员轮流发威，对手防不胜防。今仗为尽早锁定关键3分，多蒙特会疯狂逼抢求早开纪录，佢哋对上11场联赛主场，有10仗上半场开2球或以上。

作客嘅缅恩斯争夺欧洲赛资格失败，依家大踢风流波，近4场联赛输晒士无斗志，4场比赛合共失13球，当中有6球系喺开波头30分钟内被攻入，连尽力抵抗嘅意志都冇埋，今仗面对斗志惊人嘅多蒙特，上半场随时已经大败。

日耳曼班霸丧攻大隆凤

煞科日另一焦点赛事，连续10季夺冠嘅拜仁慕尼黑，将会作客无欲无求嘅科隆，拜仁今仗除咗必须取胜，仲要寄望多蒙特失分先能够衞冕，至於科隆近期放开怀抱丧攻，加上双方近年交手多次上演入球骚，睇好3.5球入球大。（周六晚上9时30分开赛）

科隆排紧第10，今场胜负对佢哋无关痛痒，不过主场谢幕战点都要向球迷交代，而且佢哋上次主场就曾以5比2大胜哈化柏林，前锋戴菲沙尔基同中场艾耶斯史基尼各建一功，甚至连中坚侯巴斯都梅开二度，可见佢哋踢得几开放，今场就算对手系争标嘅拜仁，相信都唔会有任何顾忌，继续丧攻。

拜仁上仗1比3意外不敌RB莱比锡，关键时刻痛失榜首；今场煞科战极可能会受到另一场影响，咩事都有可能发生，但拜仁始终系实力较强嘅一方，点都会尽力争取赢波，再寄望另一场有奇迹出现，但既然双方近8次联赛交手6次开4球或以上，3.5球入球大更值博。