曼联继斟掂车路士中场美臣蒙特之後，今夏第2签亦即将出现，目标直指宾菲加前锋干卡路拉莫斯，宾菲加会长雷哥斯达透露，红魔鬼愿意以6,900万镑(约6.8亿港元)收购呢位22岁葡萄牙国脚，睇来好事近。

曼联一直欠缺1位可靠前锋，曾经传出希望签入哈利卡尼，但困难重重，所以准备转移目标向干卡路拉莫斯埋手。宾菲加要求6,900万镑转会费，会长雷哥斯达接受葡萄牙传媒访问时，表示有信心红魔鬼会接受报价。

曼联中场般奴费南迪斯亦话好希望呢位国家队队友成「魔」，佢话：「干卡路拉莫斯喺国家队嘅表现，令到我及其他队友感到惊喜，佢强壮、年轻、位置感强，拥有一切喺英超立足嘅条件，好想佢加盟曼联，但要由管理层决定。」

干卡路拉莫斯刚过去球季，为宾菲加上阵47场入27球及12次助攻，并喺上年世界盃射入3球，人气急升，被视为C朗接班人，引起曼联等多间大球会关注。