英超球会阿士东维拉自艾美利执教後成绩起飞，球会喺转会市场亦展现决心，据转会权威Fabrizio Romano报道，维拉已同维拉利尔倾掂数，将以3,000万镑(约2.96亿港元)收购西班牙中坚柏奥托利斯，佢同艾美利2年前曾合作赢欧霸盃冠军，下季将喺英超重聚。

26岁嘅柏奥托利斯曾经系曼联、利物浦等豪门目标，上年亦有份代表西班牙出战卡塔尔世盃，今次维拉利用艾美利同新任总监蒙奇嘅「西甲关系」，成功抢赢呢位西班牙中坚，消息指柏奥托利斯将同维拉签约5年。

维拉早前已经宣布签入自由身中场泰利文斯，据报佢哋仲想收购意大利前锋费达历高基艾沙，以及列斯联嘅美国中场泰拿阿当斯。