祖迪比宁咸以1亿欧元转会费加盟西甲班霸皇家马德里，成为今夏最瞩目转会之一。呢位英格兰新星更着上昔日球会名宿施丹嘅5号波衫，被睇好踏上新世代球王之路。不过风光背後充满暗涌，事关曾经有4位英格兰名将登上「银河舰队」扬帆出海，点知最终「搭沉船」，成为事业走下坡嘅转捩点。依家同大家回顾呢啲「英军黑历史」，放长双眼睇下「祖迪仔」会唔会步一班前辈後尘！

玻璃脚活基治首季冇出过

米杜士堡出身、喺列斯联同纽卡素打响名堂嘅活基治，系着名嘅「玻璃脚」，但2004年皇马突然宣布以1,340万镑签入呢名英格兰中坚，令唔少球迷「??爆头」，毕竟当年皇马实行「一年一星」政策，活基治喺球迷心目中嘅卡士，同费高、施丹、朗拿度以至碧咸，点都有大段距离。

处子战摆乌龙兼被逐

事实上，活基治加盟「银河舰队」後，头一季因伤患从未上阵，到咗2005/06年球季终於有机会，不过佢嘅处子战堪称灾难，喺主场斗毕尔包，25分钟头槌改变对方远射方向摆乌龙，踢到66分钟更两黄一红被逐，虽然皇马最後反胜3比1，但活基治就成为悲剧主角。呢一季连同盃赛，佢只为皇马上阵14场，到2006/07年球季被借返去米杜士堡，2007年4月亦正式离队加盟米堡。

未能融入奥云得1年货仔

英格兰「金童」奥云2004年夏天，以800万镑转会费加盟皇马。当时「银河舰队」已经手握「6条烟」，奥云来投谂住如虎添翼，点知同阵中一班球星包括朗拿度、施丹及费高等，点夹都夹唔到，佢开季初段只能沦为後备，等到欧联对基辅戴拿模一役，先交出加盟後首个士哥。

踢法唔夹「6条烟」

好景不常，皇马该季最终「四大皆空」，西甲得亚军、欧联同西班牙盃都喺16强出局。由於踢法上无法适应，加上皇马喺2005年签入罗宾奴同巴迪斯达两位巴西射手，奥云嘅皇马生涯短短一季就结束，之後重返英超转投纽卡素，但已经无复当年勇。埋单计数，奥云为皇马上阵45场，只系射入16球，而呢一年「银河舰队」嘅经历，亦系呢位英格兰金童由盛转衰嘅转捩点。

麦马拿文唔肯走浪费光阴

踢法同外型同样潇洒嘅麦马拿文，出身於利物浦青年军，擅於喺边路突破，佢同碧咸可以话系当时英格兰球坛「边路双王」，亦属於利物浦上世纪90年代标志人物。当全世界以为麦马拿文会将职业生涯奉献晒畀「红军」，点知佢拒绝续约，1999年以自由身转战西甲。

费高施丹来投冇位踢

麦马拿文效力皇马首季演出唔错，但情况好快急转直下，因为会方推行「星战计划」，先後签入两大巨星费高同施丹，令麦马拿文长坐冷板。

事实上，时任皇马主帅迪保斯基已经向麦马拿文讲明唔会重用佢，仲打算将佢卖走，但当年28岁嘅麦马拿文坚持留低，即使做「观众」亦唔介意，白白浪费最黄金嘅3年球员生涯。随住碧咸2003年夏天加盟，加上皇马改由奎罗斯领军，麦马拿文最终被放弃，以自由身转投曼城，去到2005年亦黯然挂靴。

高山低谷碧咸不似预期

英格兰「万人迷」碧咸喺2003年夏天离开曼联，加盟皇马，同施丹、朗拿度、费高、鲁尔同卡路士摧手组成经典「6条烟」组合，震撼球坛。虽然碧咸喺皇马嘅4年岁月唔称得上「好失败」，但肯定唔符合大家嘅期望，佢加盟皇马前3季，皇马西甲排名分别系第4、第2同第2名，欧联亦未试过突破8强，对於「银河舰队」嚟讲，绝对系唔合格。

最後一季西甲封王攞尾彩

讽刺嘅系，碧咸最後一季「失宠」後，先帮皇马拎嘅唯一一次西甲冠军。当年皇马请到意大利名帅卡比路执教，碧咸随即失去正选，2007年1月宣布完约後加盟洛杉矶银河後，更被卡比路同会长卡达朗批评，讲明剩低半季都唔会派佢上阵。不过卡比路最终改变主意，碧咸喺季尾获得重生，皇马最终亦喺煞科战力压巴塞封王。碧咸嘅皇马生涯经历高山低谷，总叫有过光辉时刻，但整体而言绝对不似预期。

水土不服西甲系「三狮兵坟墓」

以往亦有好多「三狮兵团」球星，转战重视个人技术嘅西甲，搞到「水土不服」。最着名系连尼加，1986年佢挟英甲兼世盃金靴之威名，由爱华顿转投巴塞，上阵138仗射入52球，睇数据其实唔差，不过1988年巴塞由告鲁夫执教後，夹硬要连尼加打右翼，令呢位「入球机器」威力大减，翌季黯然离队回流返热刺。

哥利摩亚宾纳极速败走

至於曾经属英格兰最高转会费纪录保持者嘅哥利摩亚，喺利物浦短暂威过一轮後愈踢愈霉，2001年1月辗转去咗西甲弱旅奥维多，但都只系踢咗3仗咁大把，就被主帅安迪批评佢体能唔掂，呢位30岁性格巨星盛怒下宣布挂靴。

另一曾被喻为英格兰未来之星嘅宾纳，喺阿仙奴、列斯联同利物浦都未能上位，2009年毅然加盟萨拉戈萨，可惜佢冇珍惜呢次翻身机会，表现曳之余仲不守纪律，训练经常迟到，球会短短一季後就赶走呢个「瘟神」。