西班牙名将恩尼斯达7月1日正式同神户胜利船解约，39岁嘅「小白」职业生涯有可能告一段落，除咗2010年世盃一箭定江山助西班牙夺冠，恩尼斯达喺2009年与巴塞隆拿一众兄弟赢得「6冠王」同样成就非凡，咁到底呢一班巴塞功臣究竟依家做紧乜呢？

伊度奥荣升足总主席

伊度奥喺2009年离开巴塞，去过意甲、俄超、英超及土超等联赛搵食，2015-16年度更喺安塔利亚做过球员兼教练。伊度奥於2019年挂靴，两年後呢位曾3夺欧联冠军嘅射手，当选喀麦隆足总主席，并且进身上年世盃决赛周，佢上任後致力打击该国经常虚报年龄嘅问题，今年年头喀麦隆U17出战U17非洲盃，被发现有多达30多人「报细数」，伊度奥狠心地将佢哋踢走，维护「非洲雄狮」尊严。

年龄：42岁

效力巴塞隆拿年份：2004-2009年

离开巴塞曾效力球队：国际米兰、安治、车路士、爱华顿、森多利亚、安塔利亚、高耶、卡塔尔SC

马基斯执教巴塞B队

墨西哥名将马基斯效力巴塞隆拿长达7年，体内已经留下巴塞嘅DNA，2022年佢正式重返巴塞，出任B队教练一职。22/23球季佢带领巴塞B拎到升班附加赛资格，虽然最终未能升上西乙，但执教能力已获肯定，早前更宣布同球会续约1年，下季继续带领巴塞B队比赛。据报马基斯仲有份参与巴塞喺中北美洲嘅球探网络，帮手发掘喺美职或墨西哥等地方有潜质嘅新人。

年龄：44岁

效力巴塞隆拿年份：2003-2010年

离开巴塞曾效力球队：纽约红牛、利昂、维罗纳、阿特拿斯

耶耶托尼做助教偷师

耶耶托尼效力巴塞3年，表现并唔抢镜，转投曼城後，踏上事业颠峰，捧过3次英超冠军。呢位前科特迪瓦国脚挂靴後，投身教波工作，曾担任乌克兰球队奥林比当尼斯克、俄罗斯球队艾卡马特嘅助教，上年8月加入热刺，做U16青年军教练，今年6月转投比甲球队标准列治做助教。

年龄：40

效力巴塞年份：2007-2010年

离开巴塞曾效力球队：曼城、奥林比亚高斯、青岛FC

沙维带母会赢西甲

沙维系恩尼斯达生涯嘅最佳拍挡，佢比恩尼斯达大4岁，亦早佢3年离开巴塞，转投卡塔尔球队艾萨德，挂靴後在该队转当教练，先後以球员及教练身份赢得联赛锦标，2021年尾接替被辞退嘅朗奴高文，重返巴塞执教，球队亦喺佢手上进行重建，今季终於有所收获，重夺西甲冠军。

年龄：43岁

效力巴塞年份：1998-2015年

离开巴塞曾效力球队：艾萨德

美斯空降美职大阵仗

美斯喺去年卡塔尔世盃一尝冠军心愿，率领阿根廷捧盃後足球生涯大圆满，今季喺巴黎圣日耳门冲击欧联再度失败亦唔再坚持，同PSG约满後离开同欧洲，拒绝来自沙特嘅巨额薪酬，为家人将来生活着想决定去美职发展，接受碧咸邀请空降国际迈亚密。据报美职当局特别为「球王」驾到取消球员薪酬上限规定，其人工更由29支美职球队众筹。

年龄：36岁

效力巴塞年份：2004-2021年

离开巴塞曾效力球队：巴黎圣日耳门

佩奥尔搞IT出虚拟币

传奇队长佩奥尔挂靴後，担任西甲其中一位大使，经常会为西甲去世界各地进行推广活动。佩奥尔喺2019年更同拍档创立公司Olyseum，发展虚拟世界平台，主要开发体育明星同支持者之间嘅互动网络，甚至有自己嘅虚拟货币。为咗全力发展呢项崭新事业，据报佩奥尔去年同家人搬去安道尔定居，方便打理公司业务。

年龄：45岁

效力巴塞隆拿年份：1999-2014年

离开巴塞曾效力球队：退休

亨利一心争掌PSG

亨利於2009年喺巴塞一圆欧联冠军梦後，并在2014年年尾宣布退役，2016年8月出任比利时助教，两年後协助「欧洲红魔」夺得世盃季军，可惜之後正式执教摩纳哥同蒙特利尔冲击（现为CF蒙特利尔）都唔成功，上年重返比利时做助教，却於分组赛出局，虽然有指佢会获得扶正，但「欧洲红魔」最终请咗泰迪斯高，近日有传巴黎圣日耳门（PSG）若请到拿高斯文任教，就搵亨利做助手，不过佢更想做主帅。

年龄：45岁

效力巴塞隆拿年份：2007-2010年

离开巴塞曾效力球队：纽约红牛、阿仙奴（借用）

施度基达返马里办慈善

施度基达2012年离开巴塞後，曾经两度前往亚洲搵食，包括加盟中超球队大连人，2016/17年球季效力卡塔尔球队艾查殊1季就挂靴。呢位马里名将退投後，并冇从事教练工作，甚至已淡出球坛，但佢热心公益，曾於新冠肺炎疫情期间，捐钱帮助近600个受影响嘅马里家庭，成为一位大慈善家。

年龄：43

效力巴塞年份：2008-12年

离开巴塞曾效力球队：大连人、华伦西亚、罗马、艾查殊

丹尼尔涉性侵面临入狱

「冠军猎人」丹尼尔两度离开巴塞隆拿，第一次系2016年，之後分别喺祖云达斯攞意甲同意盃冠军，为巴黎圣日耳门夺法甲2次、法盃同法联盃。於2019年重返巴西效力圣保罗，踢咗两年因合约纠纷喺2021年9月提前解约，再喺同年11月以自由身回归鲁营球场，丈义帮助昔日队友沙维，只收「象徵性」1欧元月薪，踢咗半年帮巴塞重回正轨就离开。喺第二次离队後，丹尼尔选择去墨超闯荡，加盟普马斯，不过旧年被西班牙警方拘捕，指佢喺巴塞隆拿一间夜店性侵一名女子，佢一直否认事件，依家被当局拘留，普马斯亦宣布同佢解约。

年龄：40岁

效力巴塞隆拿年份：2008-2016年、2021-2022年

离开巴塞曾效力球队：祖云达斯、巴黎圣日耳门、圣保罗、普马斯

艾比度被爆偷食一身蚁

艾比度2018年重返巴塞隆拿担任总监，但不擅管理，曾公开批评球员唔尽力，导致成绩差，企图推卸责任，结果惹起当时球王美斯不满，同佢展开隔空骂战。2020年8月，巴塞喺欧联以2比8惨败畀拜仁慕尼黑後，呢位法国名宿孭镬被炒。艾比度私生活亦一团糟，一年半前承认「偷食」巴黎圣日耳门女足球员基娜，导致离婚，事业及家庭都输。

年龄：43

效力巴塞年份：2007-2013年

离开巴塞曾效力球队：摩纳哥、奥林比亚高斯

古庄臣见证囝囝成材

古庄臣当年喺巴塞只系後备，离开咗足迹遍布欧亚，踢到37岁先收山。古庄臣除咗之前做过冰岛U21及国家队助教外，亦出任冰超球队夏拿佐杜亚主帅，成绩一般，上年赢过冰联盃冠军。不过古庄臣前年10月担任冰岛助教期间，喺世盃外主场大胜列支敦士登4比0之役，在场边见证两位囝囝、施云古庄臣妙传安达古庄臣建功，令呢位前巴塞中锋老怀安慰。

年龄：44岁

效力巴塞隆拿年份：2006-2009年

离开巴塞曾效力球队：摩纳哥、热刺（借用）、史笃城、富咸（借用）、AEK雅典、布鲁日舒高、布鲁日、保顿、沧州雄狮、莫迪、普纳

域陀华迪斯遭拉波塔跣镬甘

巴塞青训产品域陀华迪斯（VV）完成合约後，曼联同佢签咗18个月做迪基亚後备，其後去过标准列治同米杜士堡後挂靴。VV曾经於2019年出任巴塞隆拿U19教练，但3个月後被炒鱿。华迪斯之後教过一支西班牙第四级联赛球队Horta，到2021年佢辞职，全力协助拉波塔竞选巴塞会长，并以畀VV入董事局为回报，结果拉波塔当选後竟过桥抽板只安排佢做守门员教练，两人倾唔掂数，VV自此远离拉波塔同巴塞。

年龄：41岁

效力巴塞隆拿年份：2002-2014年

离开巴塞曾效力球队：曼联、标准列治、米杜士堡

碧基积极从商瓣瓣有

西班牙足球Icon之一嘅碧基，啱啱过去嘅球季亦系巴塞隆拿赢西甲冠军功臣之一，踢咗半季嘅佢，喺上年11月突然宣布提前终止合约兼退休，结束佢辉煌嘅足球生涯。其实碧基喺近年已经积极发展商业王国，有自己嘅足球队、时装品牌、运动媒体公司、游戏公司等等，而且碧基亦卷入出轨、同前歌星女友Shakira分手嘅风波，可以话周身唔得闲。

年龄：36岁

效力巴塞隆拿年份：2008-2022年

离开巴塞曾效力球队：退休

布斯基斯跟美斯去搵食

布斯基斯比恩尼斯达细5岁，2008年出道嘅佢刚好赶上地上最强王朝盛世，喺美斯、沙维、恩尼斯达等强大队友身边成长，喺巴塞度过15个球季，布斯基斯今夏决定离队，并追随美斯步伐，拒绝来自沙特巨额合约引诱，转投美职国际迈亚密，嚟紧将会同美斯再续前缘，征战美职。

年龄：34岁

效力巴塞年份：2008-2023年

离开巴塞曾效力球队：待定