阿仙奴喺冬季转会窗签入3名新兵，由英超球会收购嘅李安度杜沙特同佐真奴都系球迷熟悉嘅球星，反而波兰中坚积及基奥柯较为陌生，不过呢位22岁新星原来唔简单，据报佢加盟後操练着晒火，更打破多项球会内部训练纪录，值得留意。

积及基奥柯由意甲嘅史柏斯亚加盟，上场英足盃已经坐後备席但未有登场，据《London World》报道，佢喺练习期间展现惊人运动力，接连打破短途冲刺、敏捷跳跃同站立跳跃3项球会纪录。据报比利连喺2015年以4.41秒完成40米冲刺，打破禾确特嘅纪录，有传呢个纪录之後又被基兰泰亚尼打破。

积及基奥柯经理人表示，阿仙奴早喺卡塔尔世盃前已经同佢哋进行斟介，而祖云达斯、AC米兰同拿玻里都向史柏斯亚提出收购，不过呢位波兰国脚就一心加盟阿仙奴，令转会可以顺利达成。