曼联今个夏天买人未有着落，不过备战计划就冇任何停顿，半队主力会喺下个星期闪电重返卡宁顿训练基地复操，并随即展开25日内丧踢7场嘅季前热身之旅，据报「红魔鬼」季前热身总飞行距离超过24,000公里，成为全英超季前最忙碌球队！

虽然球季只系完咗冇耐，但系新球季备战好快又展开，据《曼彻斯特晚报》报道，曼联安排球员分两批归队，夏天未有国际赛要踢嘅球员下星期就会复操，当中包括华拉尼、安东尼马迪尔、查顿辛祖、费特、云比沙卡等等，伤愈复出嘅利辛度马天尼斯同云迪碧克、外借回归嘅阿密特迪亚路预计亦会喺度。

至於有份踢国际赛嘅般奴费南迪斯、拉舒福特、基斯甸艾历臣、卡斯米路、哈利马古尼、劳基梳尔、加拿祖等15名国脚，就会喺7月10日先归队，确保佢哋有至少3个星期「叉电」时间，领队坦哈格希望到时仲会有新球员加盟，头号猎物系英格兰中场美臣蒙特。

英国《太阳报》报道，曼联系全英超季前最忙球队，佢哋首场热身赛系7月12日喺挪威对列斯联，最後一仗系8月6日喺爱尔兰对毕尔包，中间仲会飞去美国踢4场波，包括24小时内「分身」连斗域斯咸同皇家马德里，总飞行距离超过24,000公里。

日前有消息指坦哈格已为球员安排「地狱特训」，刻苦程度媲美英国陆军特种部队空军特勤队（SAS）嘅练习，消息人士指坦哈格希望提升球员嘅耐战力，以应付新球季英超、欧联嘅艰苦赛程。曼联新一季英超首战系8月15日凌晨主场对狼队。