阿根廷「球王」美斯上年完成捧世盃冠军心愿，不过36岁嘅佢未有退休打算，早前宣布加盟美职国际迈亚密後，有传佢向阿根廷领队史卡朗尼提出「请假1年」，暂停国家队嘅比赛，腾出更多时间同家人适应美国新生活。美斯周日(25日)再披阿根廷战衣踢表演赛，只踢半场就连中三元。

据英国《每日镜报》报道，美斯今月中为阿根廷嚟北京踢热身赛後，向史卡朗尼提出暂别国家队嘅要求，主要目的系集中精神安顿家人喺美国嘅生活，希望12个月後重返阿根廷，目标系出战2026年由美国、加拿大、墨西哥合办嘅世盃，至於明年夏天举行嘅美洲国家盃，暂未知美斯会唔会参加。

报道指史卡朗尼对美斯嘅要求感到震惊，不过亦会如佢所愿，而有关申请要先经过阿根廷足总审核，但同样预计问题不大。据报美斯会喺7月22日为国际迈亚密首演，向新球会报到前依家返阿根廷过佢嘅36岁生日(6月24日)，周日佢更披起阿根廷战衣对母会纽维尔旧生，作为前队友麦斯洛迪古斯嘅告别赛。

曾效力马德里体育会、利物浦等球会嘅麦斯洛迪古斯，今年初宣布挂靴，今场告别赛安排佢最後效力嘅纽维尔旧生对阿根廷，赛事球星云集，巴迪斯图达、奥迪加、甘比亚素、迪马利亚、沙维奥拿等名宿都有参加，不过锋芒肯定畀美斯抢晒，纽维尔旧生球迷仲出埋无人机同大型灯火Show为美斯庆生日。

告别赛美斯再披阿根廷战衣，全部球员都着上麦斯洛迪古斯嘅11号，美斯只系踢上半场，但已经足够时间畀佢演帽子戏法，包括开波4分钟轰入精彩罚球，最终纽维尔旧生以7比5赢波。美斯赛後亦暗示唔会因为赢世盃就退休：「世盃冠军的确好特别，但所有球员嘅梦想...系会谂未来仲可以赢乜，而唔系过去赢过啲乜嘢。」