曼城上季横扫球坛做「3冠王」，去年加盟嘅小将沙治奥高美斯亦系功臣之一，虽然佢喺左闸位置争唔赢尼敦阿基同文路尔艾简治，但喺英超亦有12次上阵纪录。更令球迷惊讶嘅系，沙治奥高美斯依家为西班牙U21出战欧国盃，以左翼身份上阵成为球队尖刀，佢亦表明下季会继续留曼城争夺正选位置。

22岁嘅沙治奥高美斯上年由安德列治加盟曼城，转会费达1,100万镑(约1.1亿港元)，领队哥迪奥拿视佢为长远投资。沙治奥高美斯今届U21欧国盃亦展示多才多艺一面，以左翼身份上阵，首仗对罗马尼亚U21就交出1入波1助攻，上轮再次交出助攻帮西班牙U21赢1比0，成为球队最强进攻法宝。

有传般尼希望向曼城借用沙治奥高美斯，不过呢位小将就断言拒绝：「我未同哥迪奥拿倾过下季嘅安排，但我肯定想继续留低，我会喺季前集训嘅第1分钟就全力以冬赴，向哥迪奥拿证明我值得有更多上阵时间，留队系我嘅愿望。」