欧洲各大联赛煞科後，转会市场即刻炒热，西甲冠军巴塞隆拿先声夺人，同纽卡素倾掂8,000万欧元收购安东尼哥顿！呢位英格兰国脚已起程飞西班牙体测，完成後将会签约5年。

多个权威媒体证实，巴塞周一(25日)同哥顿倾掂合约，再极速同纽卡素达成协议，巴塞将支付7,000万欧元转会费，另加1,000万欧元奖金条款，成功击退拜仁慕尼黑、利物浦嘅争夺。

纽卡素领队艾迪侯域早前表示，25岁嘅哥顿夏天将会离队，佢今季上阵46场入17球，其中有10个入波嚟自欧联，而且哥顿可以踢左翼同箭头，相信系吸引巴塞嘅重要原因。

哥顿希望喺世盃决赛周前落实去向，令佢可以专心备战，而佢嘅加盟，就令另一英格兰国脚拉舒福特留喺巴塞隆拿机会大减。