周四(28日)凌晨欧协联决赛，英超球队水晶宫1比0击败华历简奴，首次出战欧洲赛即赢得冠军，写下光辉历史；领队格拉斯拿执教两季就帮水晶宫3夺锦标，以球会传奇身份光荣告别。水晶宫系近4季第6支称霸欧洲嘅英超球队，拓展英超盛世！

水晶宫今场用拿手嘅稳守突击战术应战，上半场控球较少但顶得住；51分钟禾顿禁区外放冷箭，门将扑出不远，桑马迪达快步补中。56分钟水晶宫几乎再入，耶利米宾奴射罚球中晒两条柱，桑马迪达补射又中柱，不过佢哋最终保住胜局，创会120年首次称霸欧洲。

水晶宫今届首次出战欧洲赛，原本系参加欧霸盃，但因为前班主同时系里昂老板，条例所限被逼「降格」踢欧协联，最後佢哋奋战17场下历史性夺冠。水晶宫喺1年前仍未赢过任何顶级赛事冠军，但格拉斯拿2024年上任，即帮球队赢得英足盃、社区盾同欧协联3个冠军，名留青史。

已宣布夏天约满离队嘅格拉斯拿，完场後获球员列队致敬欢送，呢位奥地利教头赛後表示：「作为领队，任何成就都唔系一个人可以达成，我要好嘅职员，当然仲要好嘅球员，呢个系团队嘅意义。由第1日嚟到，我就为球队建设信念，只要努力，乜嘢事都有可能发生。」

继阿士东维拉赢得欧霸盃冠军後，水晶宫亦赢欧协联，如果阿仙奴之後喺欧联决赛封王，英超球队就可以横扫欧洲3大盃。自从欧协联喺21/22球季出现，英超喺过去4季已有6队波欧洲称王，包括韦斯咸、曼城、热刺、车路士、维拉同水晶宫。